Për të nëntën javë me radhë në Agjencinë e Zbatimit të Gjuhës (AZGj) ka vazhduar trajnimi i përkthyesve dhe i lektorëve të gjuhës shqipe i institucioneve publike. Gjatë javës së nëntë temat që u zhvilluan ishin të ndryshme. Për temën e parë, “Përkthimi ligjor (juridik)” ligjëroi prof. Arta Selmani, ndërkaq për temën e dytë, “Përkthimi i korrespondencës ekonomike, afarizmit dhe kontratave”, ligjëroi prof. Adnan Jashari. Përkthyesit dhe lektorët edhe këtë javë kishin mundësinë të sqarojnë dilemat e tyre, që hasin në temat e lartpërmendura gjatë punës së tyre të përditshme. [gallery size="publisher-lg" bgs_gallery_type="slider" bgs_gallery_image_size="full" ids="8605,8608,8611,8614"]

Sot në hapësirat e Institutit të Trashëgimisë Shpirtërore e Kulturore të Shqiptarëve   (ITShKSh) u promovua libri i Aleksandër Stipçeviqit “Kultura Tradicionale e Arbëreshëve të Zarës”, ku të pranishëm ishin Prof.dr Skender Asani, drejtor i ITShKSh-së,  Prof.dr. Luan Përzhita,  drejtor i ASA-së Tiranë, Prof.dr. Hysen Matoshi, drejtori i Institutit Albanologjik të Prishtinës, Prof. dr. Zeqirja Neziri, studiues nga Shkupi, si dhe të pranishmit të tjerë. Fjalë rasti kishte edhe drejtori i Agjencisë së Zbatimit të Gjuhës në Maqedonin e Veriut (AZGj) Prof.dr. Ylber Sela.   Shkup, 17.5.2022

Në Agjencinë e Zbatimit të Gjuhës (AZGj) ka vazhduar trajnimi i përkthyesve dhe i lektorëve të gjuhës shqipe në institucionet publike. Gjatë javës së tetë u realizua trajnimi në dy tema të ndryshme. Për temën e parë, “Titrat”, ligjëroi Olger Brame, ndërkaq për temën e dytë, “Çështje drejtshkrimore dhe të pastërtisë së gjuhës”, ligjëroi Emil Lafe. Përkthyesit dhe lektorët kishin mundësinë që të qartësojnë dilemat e tyre që hasin në temat e lartpërmendura gjatë punës së përditshme të tyre. Shkup, 13.5.2022  

Agjencia e Zbatimit të Gjuhës (AZGj) priti sot gjuhëtaren Albulena Dehari, ligjëruese në Fakultetin Filologjik të Universitetit të Tetovës. Ajo pati rastin që të njihet më hollësisht me veprimtarinë e deritashme të AZGj-së, si dhe me planet për të ardhmen. Me këtë rast, Dehari mbajti një ligjëratë para përkthyesve dhe lektorëve të Agjencisë me temë “Përshtatja e gjymtyrëve në fjali”. Në fund, drejtori Sela falënderoi ligjëruesen duke theksuar që AZGj-ja është e hapur për bashkëpunime të ndryshme të sferës përkatëse. Shkup, 12.5.2022  

Përmes Ligjit për përdorimin e gjuhëve, rregullohet bashkëjetesa në vendVIDEO

Më 10 maj, drejtori i Agjencisë së Zbatimit të Gjuhës (AZGj), Ylber Sela i shoqëruar nga ekipi i tij, vizitoi Universitetin e Elbasanit “Aleksandër Xhuvani” ku u prit nga rektori i këtij universiteti, Skender Topi, zëvendësrektorja për kërkimin shkencor , Elvira Fetahu, zëvendësdekania e Fakultetit të Shkencave Humane, Aurela Basha, si dhe pedagogia e gjuhës, Teuta Toska. Në këtë takim u diskutua për mundësitë e bashkëpunimit të këtij universiteti me AZGj-në për organizimin e aktiviteteve të përbashkëta, si seminare, trajnime, punëtori ku do të lëvroheshin tema gjuhësore. Gjithashtu u diskutua edhe për shkëmbim stafi e përvojash. Ky takim u shfrytëzua edhe për nënshkrimin e marrëveshjes së bashkëpunimit ndërmjet dy drejtuesve të institucioneve të lartpërmendura, Skender Topi dhe Ylber Sela. Ata u dakorduan edhe në ndihmën e ndërsjellë për vendosjen e lidhjeve të komunikimit edhe me institucione të tjera me të cilat bashkëpunojnë. Shkup, 11.5.2022  

Të nderuar miq! Duke marrë pjesë në këtë aktivitet promovues, në radhë të parë dua të theksoj se është një sfidë e veçantë dhe e përhershme të futesh në botën e arbëreshëve të Italisë, aq më tepër nëse këtë e bën në mënyrë hulumtuese për të nxjerrë në dritë realitetin e dhimbshëm të kësaj mërgate të moçme, e cila njëkohësisht mbeti edhe si krenari e veçantë kombëtare e shqiptarëve. Gjithsesi, në këtë rast duhet të themi troç se pa arbëreshët ne nuk do të ishim këta që jemi sot; popull me gjuhë, me histori, me kulturë, me tradita etj. Pa dyshim, libri “Arbëreshët midis realitetit dhe mitit” i autorit Fatmir Toçi na çon ose na e kujton se mërgata arbëreshe është zemra e shqiptarëve. Aty është shpërngulja dhe vuajtja, historia dhe qëndresa, identiteti dhe natyralizimi, ekzistenca dhe vizioni. Autori në fjalë shpalos realitetin e saj duke na ballafaquar me fenomenin arbëresh i cili ia doli të mbijetojë deri në ditët e sotme pa u zhdukur as në rrethanat globale. Faktet historike dhe të dhënat e shumta që i sjell në këtë libër, nxjerrin në sipërfaqe atë që e kishim humbur gjatë historisë, pra atdheun i cili mbeti në duart e pushtuesve. Megjithatë, nga ana tjetër mund të kuptohet se arbëreshët krijuan atdheun virtual duke e bartur atë brez pas brezi në kujtesën e tyre kolektive, duke e ruajtur dhe duke e kultivuar gjuhën e lashtë, si dhe duke e ndërtuar vizionin për rikrijimin e atdheut real. Duke e lexuar këtë libër shumë të rëndësishëm historiko-kulturor, sigurisht ne kthehemi në thelbin e historisë dhe të realitetit tonë duke reflektuar më thellë për atë që kemi qenë, për atë që jemi dhe për atë që do të jemi. Mbi të gjitha, e arrijmë ta freskojmë kujtesën tonë kolektive e kombëtare, arrijmë të frymëzohemi për ta ruajtur edhe më tej qenien dhe identitetin tonë, veçanërisht gjuhën shqipe e cila po rrezikohet nga trysnia globale. Arbëreshet që i shpalos Fatmir Toçi në të gjitha dimensionet historike, kulturore, politike, shoqërore, ekzistenciale etj., na bëjnë të mendojmë dhe të bindemi se çdo vështirësi mund të tejkalohet dhe përsëri të mbetemi shqiptarë kudo që të jemi. Kjo do të thotë se proceset integruese që janë duke ndodhur, nuk nënkuptojnë edhe zhdukjen e asimilimin, por konkurrencën dhe komunikimin e barabartë midis popujve në kontinentin tonë. Duke qenë në krye të një institucioni që kujdeset për gjuhën shqipe, siç është Agjencia e Zbatimit të Gjuhës, aq më tepër ndihem i detyruar që të angazhohem në këtë aspekt. Prandaj, mund të them se libri i Fatmir Toçit është ftesë për të gjithë ne, që ta mbrojmë qenien tonë, sidomos ta ruajmë gjuhën shqipe e cila është testament i përjetshëm. Faleminderit për vëmendjen! Shkup, 6.5.2022   

Në Agjencinë e Zbatimit të Gjuhës (AZGj) ka vazhduar trajnimi i përkthyesve dhe i lektorëve të gjuhës shqipe në institucionet publike. Gjatë javës së gjashtë u realizua trajnimi në dy tema të ndryshme. Për temën e parë, Analizë teksti, ligjëroi Ajtene Qamili, ndërkaq për temën e dytë, Përkthimi i teksteve të veçanta kulturore, ligjëroi Mustafa Ibraimi. Edhe gjatë javës së shtatë u realizua trajnimi në dy tema të ndryshme. Për temën e parë, , Përkthimi i teksteve të veçanta sociologjike, ligjëroi Ali Pajaziti, ndërkaq për temën e dytë, Përkthimi i teksteve për artet dhe shkencat humane, Dorian Koçi. Përkthyesit dhe lektorët kishin mundësinë që të qartësojnë dilemat e tyre që hasin në temat e lartpërmendura gjatë punës së përditshme të tyre. [gallery bgs_gallery_image_size="full" bgs_gallery_type="slider" size="publisher-lg" ids="8416,8419"]

Në kuadër të veprimtarive kushtuar 50-vjetorit të themelimit të Akademisë së Shkencave të Shqipërisë, drejtori i Agjencisë së Zbatimit të Gjuhës (AZGj), Ylber Sela mori pjesë në Panairin mbarëkombëtar të librit akademik dhe shkencor. Gjatë qëndrimit në Tiranë, drejtori Sela mori pjesë në disa promovime librash, me ç’rast edhe i përshëndeti , duke bërë thirrje për bashkëpunim. Më konkretisht, drejtori mori pjesë në promovimin e librit “Nën hijen e Çinarit”, me autor Azis Pollozhani; në promovimin e botimit “Fjalor leksiko-frazeologjik dhe etnolinguistik i Malësisë së Madhe” të gjuhëtarit Gjovalin Shkurtaj; në promovimin e botimit “Aspekte të gjuhësisë së zbatuar” të gjuhëtarit Tomorr Plangarica, në promovimin e botimit “Monografia e Universitetit të Tetovës”. Kjo vizitë u shfrytëzua edhe për takime dhe njohje të reja të sferës së interesit të përbashkët. Shkup, 26.4.2022  

Sot, në hapësirat e Agjencisë së Zbatimit të Gjuhës (AZGj), drejtori Ylber Sela, e priti drejtorin e Inspektoratit të Vetëqeverisjes Lokale, Afrim Qokun, me të cilin diskutuan për bashkëpunim të ndërsjellë mes këtyre dy institucioneve. Sela e falënderoi homologun e tij, Qoku, për interesimin e treguar ku i ofroi ndihmë dhe mbështetje për të filluar zbatimin e Ligjit të Përdorimit të Gjuhëve në atë institucion, me udhëzime konkrete se si të fillohet dhe si të drejtohet ky proces në fazën fillestare. Nga ana tjetër, drejtori Qoku, shprehu gatishmëri dhe vullnet për të realizuar atë që është detyrim ligjor dhe pret përkrahje dhe bashkëpunim ndërmjet dy palëve për realizimin e mëtutjeshëm me sukses të këtij procesi. Të dy bashkëbiseduesit u pajtuan se komunikimi ndërinstitucional duhet të vazhdojë edhe në periudhën e ardhshme. [gallery size="publisher-lg" bgs_gallery_type="slider" bgs_gallery_image_size="full" ids="8447,8450"]