MËSOJMË SHQIP/ УЧИМЕ АЛБАНСКИ
Oct 16, 2020
AZGJ-ja përgatiti një botim elektronik me titull УЧИМЕ АЛБАНСКИ / MËSOJMË SHQIP për të gjithë qytetarët që shqipen nuk e kanë gjuhë amtare, por që janë të interesuar të marrin njohuri themelore ose ta mësojnë gjuhën shqipe në një nivel fillestar. Botimin mund ta shkarkoni nga ueb-faqja e AZGJ-së dhe besojmë se do të jetë i dobishëm për ju. [wp-embedder-pack url="https://apj.gov.mk/wp-content/uploads/2020/10/Учиме-албански-Mesojme-shqip.pdf" width="100%" height="400px" download="all"][/wp-embedder-pack]
Takim i drejtorit të AZGJ-së Ylber Sela me kreun e BFI-së
Oct 13, 2020
Sot drejtori i Agjencisë së Zbatimit të Gjuhëve, Ylber Sela e vizitoi Bashkësinë Fetare Islame, ku u mirëprit nga kreu i saj Reis-ul Ulema Shaqir Fetahu. Takimi i dy titullarëve kishte për qëllim shkëmbimin e pikëpamjeve dhe shqetësimeve të përbashkëta, në lidhje me zbatimin e gjuhës shqipe si brenda institucioneve, ashtu dhe në jetën publike. Drejtori i AZGJ-së, Sela pasi ia uroi zotëri Shaqir Fetahut postin e reisit në këtë institucion të lartë që e udhëheq jetën shpirtërore të qytetarëve të besimit islam, me këtë rast ia dhuroi disa botime të AZGJ-së që shërbejnë si informacione të dobishme në zbatimin e gjuhës shqipe: “Udhëzuesin për zbatimin e Ligjit të Përdorimit të Gjuhëve”, si dhe botimin e fundit “Doracaku për nëpunësit administrativë”. Të dy titullarët u pajtuan se zbatimi i gjuhës shqipe është një çështje e rëndësishme që u përket të gjithë qytetarëve. Përveç të tjerash, ata shprehën pikëpamjet e sinqerta dhe vullnetin e mirë që bashkëpunimi midis AZGJ-së dhe BFI-së, duhet të zhvillohet në mënyrë më cilësore në aspektin e kultivimit dhe të artikulimit të gjuhës shqipe në të gjitha segmentet e shoqërisë sonë. [gallery bgs_gallery_type="slider" ids="4767"]
AZGJ-ja shënoi Ditën Ndërkombëtare të Përkthimit
Sep 30, 2020
Me rastin e Ditës Ndërkombëtare të Përkthimit, Agjencia e Zbatimit të Gjuhës sot zhvilloi një aktivitet të veçantë kushtuar kësaj date. Kjo ngjarje kishte të bëjë me promovimin e dy librave, përkatësisht “Shkrime rreth përkthimit” të Xhevat Lloshit dhe “Bazat e përkthimit dhe të interpretimit” të Ismail Hamitit. Fjalë rasti për librin e Xhevat Lloshit, të cilin e botoi AZGJ-ja, mbajti profesoresha Ajtene Hajdari Qamili e cila foli për përmbajtjen dhe vlerat e veçanta të tij. Po ashtu ajo foli edhe për librin e Ismail Hamitit duke u përqëndruar në strukturën dhe rëndësinë e këtij libri që trajton çështjen e përkthimit dhe të interpretimit. Në vazhdim, për librin e Xhevat Lloshi foli edhe referuesi Naim Berisha nga Instituti Albanologjik i Prishtinës i cili e vuri në spikamë personalitetin e gjuhëtarit Xhevat Lloshi, dhe njëkohësisht duke i theksuar edhe disa aspekte që e karakterizojnë librin e tij. Fjalë rasti pati edhe Hidajete Azizi nga ITSHKSH-ja e cila vuri në dukje aspektet e rëndësishme të dy librave, përkatësisht atë të Xhevat Lloshit dhe të Ismail Hamitit. Gjithashtu në këtë promovim foli edhe referuesi Berton Sulejmani, dekan i Fakultetit të Filologjisë në UT, i cili theksoi vlerat shkencore të librit “Shkrime rreth përkthimit” të Xh. Lloshit. Në fund, nëpërmjet lidhjes online, në këtë ngjarje u përfshi edhe Xhevat Lloshi i cili e falënderoi Agjencinë e Zbatimit të Gjuhës për botimin e librit të tij, si dhe për organizimin e këtij promovimi. Në mes të tjerash ai theksoi se librin e tij ia besoi pikërisht AZGJ-së për botim për arsye të respektit dhe solidaritetit që ka ndaj këtij institucioni që po bën një punë jashtëzakonisht serioze për gjuhën shqipe. Të pranishmëve iu drejtua edhe Ismail Hamiti i cili i falënderoi të gjithë ata që dhanë ndihmesë në botimin e librit të tij, veçanërisht AZGJ-në e cila bëri promovimin e tij. [gallery bgs_gallery_type="slider" size="publisher-lg" ids="4739,4742,4745,4748,4751"]
Vazhdon dialogu ndërmjet AZGJ-së dhe delegacionit të BE-së
Sep 28, 2020
Ylber Sela, drejtor i Agjencisë së Zbatimit të Gjuhës (AZGJ) priti Aleksandru - Andrej Popoviçin, Zyrtar i kualifikuar i të drejtave të njeriut, shoqërisë civile dhe i marrëdhënieve ndërmjet bashkësive në delegacionin e Bashkimit Europian në Republikën e Maqedonisë së Veriut. Në këtë takim, drejtori Sela falënderoi bashkëbiseduesin e tij për vizitën, duke e informuar atë për punën e AZGJ-së në mbështetje të përpjekjeve të qeverisë për të ndërtuar një shoqëri që garanton, respekton dhe promovon të drejtat gjuhësore të qytetarëve të saj, në përputhje me standardet europiane. Gjithashtu, drejtori Sela informoi bashkëbiseduesin e tij për punën e bërë deri më tani, projektet e planifikuara në të ardhmen, dhe shprehu gatishmërinë për të rritur bashkëpunimin me delegacionin e BE-së në Republikën e Maqedonisë së Veriut dhe ambasadorin e ri, Dejvid Gir. Popoviçi falënderoi drejtorin Sela për ftesën për një takim dhe vizitë në AZGJ, duke shprehur kënaqësi për mundësinë e dhënë për shkëmbim të drejtpërdrejtë të pikëpamjeve rreth çështjeve të interesit të përbashkët. Të dy palët theksuan angazhimin e tyre për dialog të mëtejshëm dhe bashkëpunim në projekte. [gallery bgs_gallery_type="slider" size="publisher-lg" ids="4725"]
Fjalimi i plotë i drejtorit të AZGJ-së, Ylber Sela, në tryezën e rrumbullakët me temë “Shumëgjuhësia në Republikën e Maqedonisë së Veriut – mundësi apo pengesë në procesin e shoqërisë demokratike civile, e organizuar me rastin e Ditës Europiane të Gjuhëve
Sep 26, 2020
I nderuar drejtor i Agjencisë së Realizimit të të Drejtave të Komuniteteve, zotëri Hoxhiq, e nderuara kryetare e Shoqatës së Përkthyesve dhe Interpretuesve, zonja Popova Manasievska, e nderuara përfaqësuese nacionale e Këshillit të Europës për shënimin e Ditës Europiane të Gjuhëve dhe përfaqësuese e Ministrisë së Arsimit dhe Shkencës, zonja Treneska, e nderuar profesoreshë Dragana Gjoreska, Të nderuar përfaqësues të medieve! Të nderuar të pranishëm! Kam nderin dhe kënaqësinë që së bashku kemi rastin ta shënojmë ngjarjen e sotme, e cila ka rëndësi të veçantë dhe mbahet më 26 shtator, në ditën kur Europa feston shumëgjuhësinë, respektivisht Ditën Europiane të Gjuhëve. Këtë ditë simbolike e shënon edhe Agjencia e Zbatimit të Gjuhës e RMV-së nëpërmjet organizimit të tryezës së sotme të rrumbullakët me një temë shumë të rëndësishme që lidhet me shumëgjuhësinë në një shoqëri demokratike qytetare. Filozofi i shquar Ludvig Vitgenshtajn ka thënë: “Nuk guxojmë të lejojmë që kufijtë e gjuhës sonë të jenë kufij të botës sonë”. Kjo thënie e urtë na kujton se vlerat e pluralitetit gjuhësor dhe roli i tij koheziv i ndërlidhjes së dallimeve, vazhdimisht duhet të riafirmohen dhe të kultivohen. Në vend që të jetë mjet për ndarje, gjuha duhet të jetë kanal komunikimi, urë lidhëse dhe mjet interaksioni në komunitetin shoqëror. Shkalla e respektimit dhe e kultivimit të diversitetit gjuhësor është reflektim i shkallës së zhvillimit demokratik të çdo shteti që synon të jetë pjesë e familjes europiane të shteteve me traditë të pasur demokratike. Besoj që prania e gjithë pjesëmarrësve në ngjarjen e sotme do të mundësojë shkëmbim konstruktiv të ideve, qëndrimeve dhe mendimeve dhe se pjesëmarrësit do ta pasurojnë këtë ngjarje me fjalimet e tyre në drejtim të afirmimit të vlerave që e përforcojnë dhe e avancojnë barazinë gjuhësore, kuptimin e ndërsjellë dhe kohezionin ndëretnik në shoqëri nëpërmjet dialogut, tolerancës gjuhësore dhe respektimit të diversitetit gjuhësor. Më lejoni që, në fund të fjalimit, edhe njëherë t’ju falënderoj të gjithë folësve dhe mysafirëve të nderuar për pjesëmarrjen në tryezën e sotme. [gallery bgs_gallery_type="slider" size="publisher-lg" ids="4614,4617"]
AZGJ-ja e shënoi Ditën Europiane të Gjuhëve
Sep 26, 2020
Me rastin e 26 Shtatorit - Ditës Europiane të Gjuhëve, AZGJ-ja organizoi një tryezë të rrumbullakët në Klubin e Deputetëve me temë "Shumëgjuhësia në Republikën e Maqedonisë së Veriut - një mundësi ose pengesë në procesin e ndërtimit të një shoqërie qytetare demokratike". Drejtori i AZGJ-së, Ylber Sela, iu drejtua të pranishmëve dhe përfaqësuesve të medieve, duke theksuar se AZGJ-ja njeh rëndësinë e kësaj date simbolike që shënon shumëgjuhësinë dhe diversitetin gjuhësor në Europë. AZGJ-ja do të vazhdojë ta shënojë këtë datë të rëndësishme, sepse shkalla e respektit dhe edukimit të larmisë gjuhësore është pasqyrim i shkallës së zhvillimit demokratik të secilit shtet. Në tryezën e rrumbullakët, paraqitje kishin edhe Xhelal Hoxhiq, zëvendësdrejtor i Agjencisë së Realizimit të të Drejtave të Bashkësive; Ana Popova Manasievska, kryetare e Shoqatës së Përkthyesve dhe të Interpretuesve (MATA); Diana Treneska, përfaqësuese nacionale e Këshillit të Europës për shënimin e Ditës Europiane të Gjuhëve dhe përfaqësuese e Ministrisë së Arsimit dhe të Shkencës; Dragana Gjoreska, profesoreshë në SHEJQSH "Vasil Antevski - Dren", si dhe profesoresha universitare Ajten Hajdari-Qamili. [gallery bgs_gallery_type="slider" size="publisher-lg" ids="4669,4672,4675,4678,4681,4684"]
Biblioteka e AZGJ-së u pasurua edhe me Fjalorin e Termave në Arsim
Sep 25, 2020
Agjencinë e Zbatimit të Gjuhës e vizituan autorët e Fjalorit të Termave në Arsim, shqip-maqedonisht dhe maqedonisht-shqip, mr. Ardiana Isahi Palloshi dhe mr. Ridvan Zeqiri, të cilët i priti drejtori Ylber Sela me bashkëpunëtorët e tij i cili i informoi lidhur me aktivitetet dhe projektet e institucionit që e udhëheq. Gjatë këtij takimi ata biseduan edhe për shumë çështje që kanë të bëjnë me gjuhën shqipe, sidomos me terminologjinë në përgjithësi. Më këtë rast autorët në fjalë i dhuruan disa kopje të këtij fjalori për bibliotekën e AZGJ-së. Kështu, mozaikut të gjerë të fjalorëve për nevojat e përkthyesve dhe lektorëve iu shtua edhe ky fjalor i veçantë. [gallery size="publisher-lg" bgs_gallery_type="slider" ids="4656,4659"]
Në Dibër dhe Strugë, AZGJ-ja shpërndau broshurën për të drejtat gjuhësore
Sep 25, 2020
Nëpunësit administrativë të Agjencisë së Zbatimit të Gjuhës (AZGJ) dje dhe sot në Dibër dhe Strugë shpërndanë broshurën për të drejtat themelore gjuhësore në Republikën e Maqedonisë së Veriut. Qëllimi i publikimit dhe i shpërndarjes së kësaj broshure është që qytetarët të njihen me të drejtat e tyre themelore gjuhësore. Kjo përmban informacione të mjaftueshme e të sakta, si dhe sqarohet se ku mund qytetarët ta përdorin gjuhën amtare në institucionet shtetërore. [gallery size="publisher-lg" bgs_gallery_type="slider" ids="4638,4641,4644,4647"]
Njoftime
Shiko të gjithaBuletin
Shiko të gjithaFurnizime Publike
Shiko të gjithaInformacion kontakti
-
rr., “Filipi i Dytë i Maqedonisë” nr. 11, kati i 3-të
Shkup, Republika e Maqedonisë së Veriut -
Phone number
02 312 1731
- Email
info@apj.gov.mk - Email