news image
Agjencia e Zbatimit të Gjuhës mbajti Konferencën Shkencore “Gjuha dhe etnia”

Muajin nëntor, i cili tashmë njihet si muaj i festave te shqiptarët gjithandej, Agjencia e Zbatimit të Gjuhës e RMV-së e shënoi me një aktivitet domethënës, përkatësisht me organizimin e Konferencës Shkencore “Gjuha dhe etnia”.Kjo konferencë u mbajt në auditorin e Universitetit të Europës Juglindore në Shkup, ku morën pjesë një numër i konsiderueshëm gjuhëtarësh e historianësh nga Maqedonia e Veriut, nga Shqipëria dhe nga Kosova, si Beqir Meta, Asllan Hamiti, Hysen Matoshi, Marenglen Verli, Sabit Syla, Fehari Ramadani, Qerim Lita, Haxhi Ademi, Sevdail Demiri, të cilët me kumtesat e tyre trajtuan çështje të ndryshme që kanë të bëjnë me identitetin kombëtar të shqiptarëve, me gjuhën shqipe si shenjë identitare, me alfabetin dhe drejtshkrimin e gjuhës shqipe, me shkollat e para në gjuhën shqipe, me bashkëpunimin arsimor, shkencor e kulturor, me rolin e gjuhës shqipe në aspektin e ndërgjegjësimit kombëtar etj.Në këtë konferencë shkencore ishin të pranishëm edhe zëvendëskryeministri i parë i RMV-së, Izet Mexhiti, ministri i Politikës Sociale, i Demografisë dhe i Rinisë, Fatmir Limani, kryetari i Komunës së Çairit në Shkup, Visar Ganiu, këshilltarë të ndryshëm, përfaqësues të Ambasadës së Republikës së Kosovës në RMV, të punësuarit e Agjencisë së Zbatimit të Gjuhës, gazetarë, studentë etj.Zëvendëskryeministri Izet Mexhiti i përshëndeti pjesëmarrësit e konferencës me një fjalim në frymën e mbështetjes dhe të mirënjohjes për punën e ekipit të AZGJ-së, si mision i rëndësishëm i lidhur ngushtë me historinë dhe kulturën e popullit shqiptar. Midis të tjerash, ai theksoi se, pavarësisht nga sfidat, gjuha është një nga faktorët më të fuqishëm që i bashkon shqiptarët dhe që e mbron trashëgiminë kulturore të tyre.Po ashtu, një fjalë përshëndetëse mbajti edhe drejtori i Agjencisë së Zbatimit të Gjuhës së RMV-së, Granit Osmani. Krahas tij, pjesëmarrësit në këtë konferencë i përshëndeti edhe Fatmir Limani, ministër i Politikës Sociale, i Demografisë dhe i Rinisë.Konferenca Shkencore “Gjuha dhe etnia” u mbyll me përurimin e librave të Mal Berishës, ish-ambasador i Shqipërisë në Mbretërinë e Bashkuar, si dhe me promovimin e librit të pedagogut Bardhyl Musai.Në fund, drejtori i AZGj-së, Granit Osmani, në shenjë mirënjohjeje e falënderimi për kontributin shkencor që kanë dhënë në fushën e studimit dhe të afirmimit të gjuhës shqipe, pjesëmarrësve të konferencës në fjalë ua dorëzoi nga një mirënjohje me logon ABC.Shkup, 15.11.2024

Nov 15, 2024
news image
Fjala e drejtorit të AZGJ-së, Granit Osmani, në konferencën shkencore “Gjuha dhe etnia”

 I nderuar zëvendëskryeministër i parë, Izet MexhitiI nderuar ministër, Fatmir LimaniI nderuar zëvendëssekretar i Qeverisë, Hasim MurtezaniTë nderuar të pranishëm, akademikë, profesorë, deputetë, studentë, gazetarë dhe bashkëpunëtorë të AZGj-së, mirë se erdhët në konferencën shkencore “Gjuha dhe etnia”, e organizuar nga Agjencia e Zbatimit të Gjuhës e Republikës së Maqedonisë së Veriut.Gjuha është një vlerë e veçantë për çdo popull dhe komb, andaj politika dhe planifikimi gjuhësor janë mё se të domosdoshme ashtu siç duhet të jetë edhe përkujdesja institucionale që duhet të tregojmë ndaj saj.Festat i bashkojnë të gjithë, me këtë rast ne si Agjenci e Zbatimit të Gjuhës nëpërmjet konferencës shkencore “Gjuha dhe etnia” dhe me përurimin e veprave të dy studiuesve nga Tirana, do t’i shënojmë 22 Nëntorin – Ditën e Kongresit të Manastirit si njëri nga kongreset më të rëndësishme për kulturën dhe arsimin shqiptar dhe 28 Nëntorin – Ditën e Flamurit.Nëse gjuha është ajo arkë që ruan shpirtin e një populli, atëherë alfabeti i asaj gjuhe është çelësi që mbyll dhe hap arkën e pasurisë shpirtërore të një populli. Andaj, sot kur me mburrje kremtojmë këto data, ne duhet të jemi vigjilentë që kujdesin ndaj këtyre vlerave të çmuara ta përcjellim ndër breza si shtylla të rëndësishme kombëtare.Sa kohë që një komb ruan gjuhën, ai i ka të gjitha mundësitë të mbahet gjallë dhe t’u qëndrojë rrebesheve që mund ta kërcënojnë. Andaj jo më kot Sami Frashëri thoshte: "Çdo komb mbahet me gjuhë".Të nderuar të pranishëm, akademikë, profesorë, studentë, mysafirë dhe media, më lejoni që të shpall të hapur punimet e Konferencës shkencore “Gjuha dhe etnia”, duke ju uruar punë të mbarë dhe të kaloni bukur gjatë kësaj dite.

Nov 14, 2024
news image
In memoriam

 Tahir Hani, kontribues për themelimin e AZGJ-sëTahir Hani, i cili ndërroi jetë këto ditë në moshën 63 vjeçare, ishte një figurë e spikatur e politikës në Maqedoninë e Veriut. Krahas aktiviteteve të shumta, ai ka dhënë një kontribut shumë të rëndësishëm edhe për themelimin e Agjencisë së Zbatimit të Gjuhës të RMV-së.Në vitin 2019-të kur filloi ndërtimi i strukturave të institucionit të AZGj-së, Tahir Hani, ishte nënkryetar i Komisionit ndërministror për zbatimin e gjuhës shqipe. Gjatë procesit të ngritjes së strukturave të sajë, Tahir Hani ishte bashkëpunëtor i afërt me ish drejtorin e pare, Ylber Sela, duke mbështetur stafin themelues.Tahir Hani ishte një njeri i qetë, por që buçiti me heshtjen e tij si patriot i çështjes kombëtare, ish i burgosur politik, e më vonë -ish deputet e funksionar i lartë, ai luftoi pa reshtur për të drejtat e shqiptarëve, së fundi edhe për avancimin e të drejtave gjuhësore të tyre në RMV.Tahir Hani u lind në Veleshtë të Strugës dhe diplomoi në Fakultetin Juridik në Universitetin e Tetovës.Stafi i Agjencisë së Zbatimit të Gjuhës Shqipe dhe drejtori Granit Osmani, i shprehin ngushëllime të sinqerta familjes, miqve dhe të afërmve për humbjen e parakohshme të njeriut të tyre të dashur. AZGj-ja është mirënjohëse për kontributin që dha Tahir Hani për themelimin institucionit që merret me zbatimin e dygjuhësinë në nivelet shtetërore të RMV-së.

Nov 12, 2024
news image
Drejtori i Agjencisë së Zbatimit të Gjuhës , Granit Osmani dhe kolegu i tij, nga postat e Maqedonisë së Veriut, Orhan Kurtishi takuan ambasadorin e Turqisë në Shkup, Fatih Ulusoj

Gjatë këtij takimi u diskutuan shumë tema me rëndësi që lidhen me bashkëpunimin ndërinstitucional dhe forcimin e marrëdhënieve ndërmjet dy vendeve tona. Një ndër pikat kryesore të këtij takimi ishte bashkëpunimi në fushën e gjuhës dhe kulturës, ku u theksua rëndësia e promovimit të gjuhës dhe trashëgimisë kulturore të të dy vendeve.Drejtori Osmani, shprehu përkushtimin e AZGj-së, për të vazhduar punën në zbatimin e politikave gjuhësore, duke u fokusuar në ruajtjen dhe përkrahjen e diversitetit gjuhësor, ndërkohë që z. Kurtishi, theksoi rolin e Postave të Maqedonisë së Veriut, në shpërndarjen e materialeve edukative dhe kulturore që do të kontribuojnë në këtë drejtim dhe bashkëpunimin ndërmjet postave të të dy vendeve.Ambasadori Ulusoj, në anën tjetër, vlerësoi angazhimin e institucioneve të Republikës së Maqedonisë së Veriut për zhvillimin dhe përmirësimin e marrëdhënieve ndërmjet dy vendeve dhe potencoi gatishmërinë e Republikës së Turqisë, për të mbështetur iniciativa të përbashkëta, që kontribuojnë në zhvillimin e marrëdhënieve kulturore dhe ekonomike.Ky takim dëshmoi edhe një herë se bashkëpunimi ndërmjet institucioneve është çelësi për përparimin e përbashkët dhe për forcimin e lidhjeve ndërmjet vendeve tona.

Oct 24, 2024
news image
AZGj-ja shënoi 30 Shtatorin - Ditën Ndërkombëtare të Përkthimit

 Në kuadër të programit të saj për shënimin e datave të rëndësishme për gjuhën, Agjencia e Zbatimit të Gjuhës (AZGj) shënoi 30 Shtatorin - Ditën Ndërkombëtare të Përkthimit, me temën: “Përkthimi dhe politikat gjuhësore në kontekstin e institucioneve publike”, aktivitet i ndarë në dy pjesë – ceremoniale dhe debatuese.Këtë aktivitet e çeli drejtori i AZGj-së, Granit Osmani i cili të pranishmëve u uroi mirëseardhje dhe theksoi disa çështje të rëndësishme të punës së institucionit që drejton, e që kanë të bëjnë me mbështetjen që u jepet institucioneve publike në fushën e përkthimit.Në pjesën ceremoniale ishin të pranishëm edhe përfaqësues të tjerë të institucioneve publike si: zëvendëssekretari i Qeverisë së RMV-së, Hasim Murtezani; zëvendësministri i Arsimit dhe i Shkencës, Lulzim Aliu, deputetja e koalicionit VLEN, Feride Haxhiu. Ata theksuan rëndësinë e gjuhës amtare, si dhe të një institucioni publik siç është AZGj-ja. Aktiviteti u përshëndet edhe nga Arben Fetai, zëvendëskryeministri për Politikë dhe Qeverisje të Mirë.Në pjesën debatuese të aktivitetit të cilën e çeli Nebi Bilalli, këshilltar shtetëror i përkthimit i AZGj-së, morën pjesë përfaqësues të Zyrës së Komesarit të Gjuhëve të Kosovës, me në krye Sllavisha Mlladenoviqin; pastaj përfaqësues nga fakultetet e gjuhëve si të Universitetit të Tetovës (UT), Berton Sulejmani, të Universitetit të Europës Juglindore (UEJL), Demush Bajrami, të Universitetit Shën Kirili dhe Metodiu, Ajtene Qamili dhe Ismet Osmani.Në debat morën pjesë edhe përfaqësuesja e Shoqatës së Përkthyesve të RMV-së, Blerina Starova – Zllatku dhe Lirim Shala, nënpunës administrativ i AZGj-së. Debatuesit folën për problemet rreth përkthimit cilësor, sfidat e përkthyesve, inteligjencën artificiale në përkthim dhe çështjet e transliterimit në dokumentet e identifikimit.Përfundimet e këtij aktiviteti u nxorën nga Ahmet Selmani, këshilltar shtetëror i redaktimit, sipas të cilave, duhet të bëhen ndryshimet e nevojshme ligjore që përkthimi të mos trajtohet si shërbim administrativ dhe përkthyesit të kenë një status më të lartë sesa ai i nëpunësit administrativ.

Oct 1, 2024
news image
Reagim i Agjencisë së Zbatimit të Gjuhës lidhur me deklaratën e kryetarit të Gjykatës Kushtetuese, Darko Kostadinovski

 Lidhur me deklaratën e kryetarit të Gjykatës Kushtetuese, Darko Kostadinovski se me Ligjin e Përdorimit të Gjuhëve “politika ka krijuar një lloj kaosi juridik, i cili ka rezultuar me kaos politik, mosbesim, dilema”, Agjencia e Zbatimit të Gjuhës e RMV-së reagon siç vijon:E para, deklarata e këtillë paraqet një aventurë shumë të rrezikshme për Republikën e Maqedonisë së Veriut, për shkak se preket njëra nga çështjet më të ndjeshme siç është gjuha e një etniteti, përkatësisht gjuha shqipe, çështje kjo e cila është zgjidhur me miratimin e Ligjit të Përdorimit të Gjuhëve më 2019, ligj ky që rrjedh pikërisht nga Marrëveshja e Ohrit e cila i dha fund konfliktit në këtë shtet. Ligj i cili në mënyrë të qartë dhe pa mëdyshje thotë që gjuhë tjetër zyrtare përveç gjuhës maqedonase dhe alfabetit të saj cirilik, është edhe gjuha shqipe dhe alfabeti i saj. Prandaj çdo përpjekje për ta ndryshuar këtë ose për ta reduktuar këtë të drejtë themelore, mbase është e rrezikshme.E dyta, konstatimi i kryetarit në fjalë se ky ligj “ka prodhuar kaos politik, mosbesim, dilema”, konsiderojmë se është një tendencë për ta dramatizuar situatën pa asnjë nevojë reale. Nuk mund të merret në rishqyrtim një nismë e ngritur, siç thotë ai, “nga qytetarë, parti politike, shoqata të ndryshme”, për arsye se fare nuk cenohet e drejta gjuhësore e tyre. Nismat e këtilla janë kryekëput me karakter politik, nacionalist dhe antinjerëzor. Gjuha shqipe u përket shqiptarëve dhe nuk rrezikon askënd. Tendenca për ta përjashtuar shqipen nga përdorimi zyrtar, është ide e vjetër e cila, siç e dimë, ka prodhuar tensione dhe konflikte.E treta, pavarësisht nga tendencat, përpjekjet dhe deklaratat e tilla tensionuese, Agjencia e Zbatimit të Gjuhës do të vazhdojë ta kryejë punën e vet, siç ka bërë edhe deri tani, në pajtim me Ligjin e Përdorimit të Gjuhëve, duke i ndihmuar institucionet shtetërore me përkthim dhe lekturim dokumentesh, aktesh e shkresash të ndryshme, të cilat përmbushim kërkesat dhe nevojat e qytetarëve shqiptarë në Republikën e Maqedonisë së Veriut.

Sep 2, 2024
news image
Sot në hapësirat e AZGj-së, drejtori Granit Osmani e priti delegacionin nga Inspektorati, të kryesuar nga drejtori Arsim Idrizi dhe bashkëpunëtorët e tij.

Në kuadër të bashkëpunimit ndërmjet Agjencisë së Zbatimit të Gjuhës dhe Inspektoratit të Përdorimit të Gjuhëve, si domosdoshmëri për integrimin e brendshëm të etniteteve që jetojnë në Maqedoninë e Veriut, sot në hapësirat e AZGj-së, drejtori Granit Osmani e priti delegacionin nga Inspektorati, të kryesuar nga drejtori Arsim Idrizi dhe bashkëpunëtorët e tij.Gjatë takimit u diskutua për zbatimin sa më efikas të gjuhës shqipe në RMV, gjithashtu u bisedua për hulumtimin që do ta bëjë në terren AZGj-ja në bashkëpunim me OSBE-në dhe Institutin për Demokraci-IDSCS, ku nëpërmjet një pyetësori, do të realizohet anketa në lidhje me zbatimin e dygjuhësisë. Rezultatet e anketës, të cilat pritet të dalin në dhjetor të këtij viti, sipas diskutimit të përfaqësuesve të palëve në takim, të dy institucioneve do t`ju shërbejnë për orientimin e politikave në zbatimin sa më të drejtë të gjuhës shqipe.Drejtori i Inspektoratit të Përdorimit të Gjuhëve, Arsim Idrizi, tha se ne jemi dy institucione që nuk bëjmë dot pa njëri-tjetrin.Ndërsa drejtori i AZGj-së, Granit Osmani, theksoi se institucionet tona janë si një trup i vetëm me dy krahë, që veprojnë për ta arritur qëllimin përfundimtar, zbatimin sa më efikas të gjuhës shqipe, në të gjitha institucionet që atë e kanë detyrim ligjor.Përfaqësuesit e Inspektoratit, Fitim Ramadani, Inspektor i lartë, Simona Stojkovska juriste dhe përfaqësuesit e AZGj-së Nebi Bilalli, Këshilltarë shtetëror dhe Shpresa Zeqiri Ibrahimi, përgjegjëse sektori, diskutuan edhe për çështje të tjera në funksion të zbatimit të gjuhës shqipe.

Aug 12, 2024
Informacion kontakti
  • St., "Philip the Second of Macedonia" no. 11,
    3rd floor Skopje, Republic of North Macedonia

  • Phone number
    02 312 1731
  • Email
    info@apj.gov.mk