Drejtori i Agjencisë së Zbatimit të Gjuhës (AZGj), Ylber Sela realizoi takim pune me Fatmir Isenin, drejtor i Inspektoratit të Përdorimit të Gjuhëve (IPGj).Me këtë rast, drejtorët diskutuan rreth punës katërvjeçare të AZGj-së. Njëkohësisht, Sela dorëzoi dhe raportin e shtypur të punës së deritashme në AZGj.Takime të ngjashme u mbajtën edhe me Admir Ujkanoviqin, drejtor i Drejtorisë së Kulturës së Bashkësive, si dhe me Eran Kurtish, drejtor i Agjencisë së Realizimit të të Drejtave të Bashkësive.Homologët pranuan raportin e punës, ndërkaq diskutuan për punën e deritashme të institucioneve përkatëse.

 Prof. dr. Ylber Sela, ShkupPara plot katër viteve, në konkursin e rregullt, sipas nenit 18 të Ligjit të Përdorimit të Gjuhëve, u zgjodha drejtor i parë i Agjencisë së Zbatimit të Gjuhës. Gjatë këtyre viteve kishim një veprimtari të dendur të kësaj Agjencie. Këtë javë zhvilluam aktivitetet përmbyllëse të punës katërvjeçare gjatë mandatit të parë. Promovuam botimet e fundit, si dhe raportin përmbledhës të punës për këto vite.Nuk thonë kot se koha po ik shumë shpejt. Katër vite më parë, me shumë entuziazëm, pranova detyrën e udhëheqjes së Agjencisë së Zbatimit të Gjuhës. Si çdo fillim, edhe kjo punë nuk ishte e lehtë. Jo vetëm për mua si drejtor, por i tërë ekipi themelues dhe së bashku me bashkëpunëtorët e parë, u ballafaquam me vështirësi të ndryshme. Ne jemi munduar që të kultivojmë një bashkëpunim me akademitë, institutet, qendrat albanologjike dhe universitetet e shteteve tona. Kemi pasur nevojë për përkrahje, për këshillën e tyre shkencore, që në fazat e para të themelimit të Agjencisë, si dhe gjatë tërë veprimtarisë së saj ndër vite.Agjencia, krahas përmbushjes së detyrave të përditshme, ka nxitur dhe mbështetur në vazhdimësi fushatën e ngritjes së vetëdijes publike për zbatimin e Ligjit të Përdorimit të Gjuhëve. Për këtë arsye ka zhvilluar pa reshtur, takime pune me çdo institucion shtetëror të vendit, për të ofruar ndihmën në procesin e zbatimit të Ligjit të Përdorimit të Gjuhës. Organizuam trajnime, sivjet të tretin me radhë, për përkthyesit dhe redaktorët gjuhësorë të institucioneve shtetërore në vend. Mësimdhënës në këto trajnime, janë profesorë eminentë nga universitetet, institutet, qendrat albanologjike nga Tirana, Shkodra, Elbasani, Durrësi, Korça, Prishtina, Prizreni, Shkupi, Tetova, pa kontributin e të cilëve, nuk do të kishte këtë sukses dhe cilësi, i gjithë procesi i trajnimeve.Ndër vite botuam broshura informuese, udhëzime, doracakë, në tri gjuhë, për çështje të statusit të gjuhës, politikës gjuhësore, shumëgjuhësisë dhe sfida të zbatimit të Ligjit të Përdorimit të Gjuhës. Me pjesëmarrje të studiuesve, profesorëve, albanologëve të shquar, nga të gjithë trevat shqiptare, organizuam për çdo vit, nga një konferencë ndërkombëtare, edhe me studiues të huaj, ku u trajtuan tema të ndryshme të shumëgjuhësisë dhe të politikës gjuhësore, në dobi të njohjes më të mirë të këtyre çështjeve dhe të përshpejtimit të zbatimit zyrtar të dygjuhësisë në vend. U botuan, si libra më vete, kumtesat e këtyre konferencave, në tri gjuhë, në version të shtypur dhe elektronik. Këto u shpërndanë falas për nëpunësit shtetërorë, administratën dhe bashkëpunëtorët tanë, pjesëmarrës direkt në këtë proces të zbatimit të ligjit.Zhvilluam vizita pune dhe qëndrime studimore edhe jashtë vendit, në Itali, Tirolin e Jugut, në Austri, në Zvicër, për të mësuar më shumë për modelet e suksesshme të dy- dhe shumëgjuhësisë në shtetet demokratike të Europës Perëndimore. Mësojmë përherë prej tyre, kultivojmë bashkëpunimin me institucionet përkatëse të atyre vendeve, për të lehtësuar njohjen e këtyre çështjeve, dhe për të përshpejtuar procesin e zbatimit të ligjit në fjalë.Zhvilluam anketime, intervista, tryeza shkencore, bëmë vetë kërkime dhe botuam studime për situatën dhe politikën gjuhësore, shumëgjuhësinë dhe çështje të tjera që ndërlidhen me këtë tematikë. Të gjithë këta botime, jemi munduar të jenë në tri gjuhë: shqip, maqedonisht dhe anglisht, në version të shtypur dhe digjital, për të pasur qasje, çdo bashkëpunëtor i yni, dhe secili që ka interes dhe merret me këtë problematikë.Aktivitetet e kësaj jave të fundit si drejtor i Agjencisë së Zbatimit të Gjuhës, i përmbyllëm me organizimin e tryezës së rrumbullakët, me rastin e Ditës Ndërkombëtare të Gjuhës Amtare, me temat bosht: “Gjuha shqipe dhe sfidat aktuale të saj” dhe “Gjuha standarde shqipe dhe sfidat e përdorimit zyrtar të saj”.Pjesëmarrës në këtë tryezë shkencore ishin udhëheqësit e Akademisë së Shkencave dhe të Arteve e Republikës së Shqipërisë dhe Republikës së Kosovës, si dhe emra të njohur nga kryeqendrat e albanologjisë, Tirana, Prishtina dhe Shkupi, pjesëmarrje kjo e vazhdueshme, që nga themelimi i Agjencisë. U lexuan kumtesa, si dhe u diskutua gjerë e gjatë për temën në fjalë, për sfidat e sotme të mbarë shqipes, me vështrim të veçantë u debatua, për statusin dhe sfidat e zbatimit zyrtar të shqipes në RMV.Për në të ardhmen mbetet detyrë, jo vetëm e Agjencisë, por e çdo institucioni shtetëror, e secilit individi me vete, që të përkujdesen për zbatimin e Ligjit të Përdorimit të Gjuhëve, për arritjen e barazisë gjuhësore në vend, për përshpejtim të përdorimit zyrtar të dygjuhësisë, si dhe për kultivimin e vlerave të shumëgjuhësisë.Edhe njëherë dua të falënderoj të gjithë përkrahësit dhe bashkëpunëtorët e Agjencisë për punën e palodhshme, me përkushtim të dalluar dhe kontributin që kanë dhënë ndër vite.Falënderim të përzemërt vëllazëror kam pasur përgjithmonë për këshillat, ndihmën dhe përkrahjen e vazhdueshme të studiuesve, profesorëve, albanologëve nga Shqipëria, Kosova, Mali i Zi, diaspora jonë, si dhe, kuptohet, nga vendi ynë.Uroj që edhe në të ardhmen, të kemi një vazhdimësi të sigurt të punës së suksesshme të Agjencisë. Drejtorit të ardhshëm dhe të gjithë bashkëpunëtorëve të Agjencisë ju uroj punë të mbarë dhe suksese të vazhdueshme.

 Në kuadër të shënimit të 21 Shkurtit – Ditës ndërkombëtare të gjuhës amtare, Agjencia e Zbatimit të Gjuhës (AZGj) organizoi një tryezë të rrumbullakët.Në këtë debat morën pjesë krerët e akademive të shkencave të Shqipërisë e të Kosovës, Skënder Gjinushi e Mehmet Kraja.Të ftuar ishin edhe gjuhëtarë të tjerë si, Shaban Sinani, Begzat Baliu, Ali Aliu, Teuta Arifi, Asllan Hamiti, Ismet Osmani, Zeqirja Ibrahimi, Valbona Toska, Aurela Basha, Аjtene Hajdari – Qamili, Mustafa Ibrahimi.Ngjarjen e përshëndeti edhe ish-ministri i Arsimit dhe i Shkencës, Aziz Pollozhani, ndërkaq rreth shqipes në Diasporë foli, Mimoza Hysa nga Qendra e Botimeve për Diasporën.Debati u zhvilluar rreth temës së standardit të shqipes dhe të zbatimit të gjuhës shqipe. Në fund, drejtori Ylber Sela ndau disa mirënjohje për krerët e akademive dhe kontribuesit e gjuhës.

 Agjencia e Zbatimit të Gjuhës e RMV-së ka botuar publikimin shkencor në tri gjuhë “Përdorimi i gjuhëve nga këndvështrimi krahasues ”, nga autorët prof. dr. Ylber Sela, prof. dr. Marina Andeva dhe mr. Llazo Matovski.Promovimi i botimeve të fundit (në shqip, maqedonisht dhe anglisht) vjen në prag të Ditës Ndërkombëtare të Gjuhës Amtare, që do të shënohet më 21 shkurt dhe në të cilën tema kryesore do të jetë analiza e politikave gjuhësore të 12 vendeve të përzgjedhura me traditë dhe specifikë shumëgjuhëshe.Të udhëhequr nga të menduarit nëpërmjet qasjes shkencore dhe metodologjike për të treguar kornizën ligjore dhe institucionale që e rregullon përdorimin e gjuhëve në fusha të ndryshme shoqërore në vendet e analizuara, autorët shpresojnë se ato do të jenë të dobishme për lexuesit, ndërkaq janë të disponueshme në faqen zyrtare të Agjencisë së Zbatimit të Gjuhës të RMV-së në shqip, në maqedonisht dhe në anglisht.Autorët e publikimit dëshirojnë të shprehin mirënjohjen e tyre për bashkëpunëtorët, recensentët, ekipin e ekspertëve nga Agjencia e Zbatimit të Gjuhës e RMV-së, të cilët janë përfshirë në përkthimin dhe në lekturimin e publikimit, si dhe për të gjithë faktorët e tjerë që ndihmuan në përgatitjen e tij.

 Sot në Agjencinë e Zbatimit të Gjuhës të RMV-së (AZGj) u mbajt takimi bashkërendues me nëpunësit administrativë të cilët mbulojnë detyrën e përkthyesit apo të redaktorit në institucionet publike.Ata u pritën nga drejtori, Ylber Sela dhe bashkërenduesja e programit të trajnimit, Shpresa Zeqiri Ibrahimi.Me këtë rast, nëpunësit mësuan hollësitë e nevojshme rreth programit të sivjetmë, stafit që do t’i trajnojë dhe kohëzgjatjes së trajnimit.Ndryshe, ky është viti i tretë i trajnimit të përkthyesve dhe të redaktorëve që AZGj-ja ua ofron institucioneve publike.

Në Agjencinë e Zbatimit të Gjuhës (AZGj) sot qëndroi gjuhëtari Asllan Hamiti njëherë edhe bashkëpunëtor e mbështetës i saj dhe kolegu i tij profesor Ismet Osmani.Ata u pritën nga drejtori Ylber Sela dhe të punësuar tjerë të kësaj Agjencie.Me këtë rast, gjuhëtari Hamiti i dhuroi Agjencisë disa botime të tij duke pasuruar bibliotekën e agjencisë.Veprat e këtilla janë mjaft të rëndësishme sepse paraqesin dëshmi të gjuhës, të kulturës e të traditës shqiptare në Republikën e Maqedonisë së Veriut. 

Drejtori i AZGj-së, Ylber Sela, ka vizituar Ministrinë e Shoqërisë Informatike dhe Administratës, ku u takua me ministrin Admirim Aliti.Në takim u diskutua për zbatimin e Ligjit të Përdorimit të Gjuhëve, me theks të veçantë në aktet nënligjore, që i përcakton ministri, ndërsa rrjedhin nga kompetenca e Ministrisë.Drejtori Sela e njoftoi bashkëbiseduesin për disa gjendje të caktuara, që janë konstatuar në pjesën legjislative, për të cilat është i nevojshëm harmonizimi me ligjin, ndërsa ministri Aliti e shprehu gatishmërinë e tij për bashkëpunim dhe ndërmarrje të hapave të nevojshëm në këtë pjesë.Të dyja palët e konfirmuan bashkëpunimin e mirë ndërinstitucional, me angazhime për intensifikimin e komunikimit, me qëllim përshtatjen me detyrimet ligjore dhe krijimin e mundësive për zbatimin konsekuent të ligjit.Shkup, 15.12.2022

Sot në Agjencinë e Zbatimit të Gjuhës (AZGj) qëndroi gjuhëtari Mustafa Ibrahimi, njëherë edhe bashkëpunëtor e mbështetës i saj.Ai u prit nga drejtori Ylber Sela dhe të punësuarit e tjerë të kësaj Agjencie.Me këtë rast, gjuhëtari Ibrahimi i dhuroi Agjencisë botimin e tij më të ri “Folklori dhe etnokultura shqiptare e Pelagonisë”.Veprat e këtilla janë mjaft të rëndësishme sepse paraqesin dëshmi të gjuhës, të kulturës e të traditës shqiptare në Republikën e Maqedonisë së Veriut.Shkup, 13.12.2022

Politikania shqiptare, Valentina Leskaj e shoqëruar nga drejtuesit e Shtëpisë Botuese “Toena”, Fatmir dhe Irena Toçi dhe nga shkrimtarja Diana Çuli, vizituan Agjencinë e Zbatimit të Gjuhës (AZGj), me ç’rast u pritën nga drejtori Ylber Sela.Vizita e tyre përkonte me promovimin e librit të Valentina Leskajt, “Politika si ide”, që u mbajt në Shkup.Gjatë kësaj vizite, mysafirët u interesuan për punën, sfidat dhe të ardhmen e AZGj-së, për të cilat i informoi drejtori, Ylber Sela.Shkup, 7.12.2022

Drejtori i Agjencisë së Zbatimit të Gjuhës (AZGj), Ylber Sela vizitoi Agjencinë e Administratës (AA).Ai u prit nga drejtori dhe zëvendësdrejtori i AA-së, Spase Gligorov, përkatësisht Agron Seferi.Kjo vizitë u realizua për të parë nga afër zbatimin e Ligjit të Përdorimit të Gjuhëve dhe për të parë mundësitë e thellimit të bashkëpunimit.Palët u dakorduan që të vazhdojnë takimet e këtilla informuese.Shkup, 7.12.2022