news image
DEMANT - Në lidhje me deklaratën e drejtorit të Entit Shtetëror të Statistikës, Apostoll Simovski

Në lidhje me deklaratën e drejtorit të Entit Shtetëror të Statistikës, Apostoll Simovski, të dhënë më 1 mars 2021 për TV21 lidhur me pretendimet se Agjencia e Zbatimit të Gjuhës e RMV-së (AZGJ) nuk i përkthen klasifikimet që kërkohen për regjistrimin, do të donim ta demantojmë një deklaratë të tillë të pavërtetë dhe tendencioze të tij dhe t’i theksojmë faktet në vijim: Në interes të realizimit të të drejtave të qytetarëve, me iniciativë të drejtorit të AZGJ-së, Ylber Sela, më 10 shtator 2019 është realizuar një takim pune me drejtorin Simovski, ku, nga ana e AZGJ-së, është ofruar ndihmë profesionale në pjesën e përkthimit dhe të lekturës së formularëve të cilët i përdor Enti Shtetëror i Statistikës për qëllime statistikore. Ndihma konkrete që u kërkua nga AZGJ-ja për përkthimin dhe lekturimin e formularëve zyrtarë të fushave të ndryshme statistikore u realizua plotësisht nga shërbimet profesionale të AZGJ-së, me ç’rast, në takimin e punës me ish zëvendësdrejtorin e Entit Shtetëror të Statistikës, Zirap Ademi, të mbajtur më 23 dhjetor 2019, aktet e përkthyera dhe të lekturuara iu dorëzuan Entit Shtetëror të Statistikës. Për këtë ekzistojnë dëshmi edhe në arkivin e AZGJ-së, si dhe në njoftimet mediatike të cilat janë në dispozicion në ueb faqen zyrtare të AZGJ-së. Përveç kësaj, më 24 shkurt 2021, AZGJ-së i është dorëzuar për përkthim dhe lekturë Udhëzimi për regjistrimin e popullsisë, amvisërive dhe banesave në Republikën e Maqedonisë së Veriut, 2021, e që më 25 shkurt ia kemi dorëzua Entit Shtetëror të Statistikës të përkthyer dhe të lekturuar në gjuhën shqipe. Njëkohësisht, Enti Shtetëror i Statistikës më 25 shkurt dhe 1 mars të këtij viti, me anë të postës elektronike i ka dërguar për përkthim dhe lekturë edhe materialin tjetër në lidhje me regjistrimin, që është i vëllimshëm e që nevojitet kohë për t’u përpunuar. Sidoqoftë, edhe ky do t’i dorëzohet në kohë Entit Shtetëror të Statistikës. Për këto arsye, çdoherë kur Enti Shtetëror i Statistikës ka pasur nevojë për bashkëpunim dhe ndihmë profesionale, AZGJ-ja u është përgjigjur kërkesave pa vonesë. Në këtë kontekst, vlerësojmë se përpjekjet e drejtorit Simovski që ta paraqesë AZGJ-në si partner jokonstrukiv, janë të pabaza, duke marrë parasysh se AZGJ-ja ka qenë dhe do të jetë e hapur për bashkëpunim me çdo institucion publik, përfshirë këtu edhe Entin Shtetëror të Statistikës, për realizimin e interesave të qytetarëve dhe për zbatimin e plotë të Ligjit të Përdorimit të Gjuhëve. Në qoftë se drejtori Simovski konsideron se pretendimet tona janë të pavërteta, e ftojmë që publikisht t’i vërtetojë me dëshmi pohimet e tij.

Mar 2, 2021
news image
Fjalim i drejtorit Sela në tryezën e rrumbullakët të mbajtur në kuadër të shënimit të Ditës Ndërkombëtare të Gjuhës Amtare

I nderuar zëvendëskryeministër i parë dhe ministër i Sistemit Politik dhe i Marrëdhënieve ndërmjet Bashkësive, z. A. Grubi, I nderuar zëvendësministër, z. Rahman, I nderuar sekretar shtetëror i Ministrisë së Arsimit dhe të Shkencës, z. Beluli, I nderuar drejtor i Agjencisë së Realizimit të të Drejtave të Bashkësive, z. Kurtish, I nderuar drejtor i Inspektoratit Shtetëror të Përdorimit të Gjuhëve, z. Iseni, I nderuar drejtor i Drejtorisë së Zhvillimit dhe të Promovimit të Arsimit në Gjuhët e Pjesëtarëve të Bashkësive, z. Stançiq, I nderuar drejtor i Drejtorisë së Afirmimit dhe të Promovimit të Kulturës së Pjesëtarëve të Bashkësive, z. Ujkanoviq Me shumë nder dhe kënaqësi e pranova ftesën për të marrë pjesë në tryezën e sotme të rrumbullakët, e cila mbahet në kuadër të shënimit të Ditës Ndërkombëtare të Gjuhës Amtare. Më lejoni që me këtë rast, t'i shpreh mirënjohjen time zëvendëskryeministrit Grubi për ftesën që të marr pjesë në ngjarjen e sotme, si dhe për angazhimin e tij personal për zgjidhjen e çështjes hapësinore dhe sigurimin e kushteve për funksionimin e institucioneve publike që kanë kompetenca në fushat të cilat lidhen me pjesëtarët e komuniteteve, për t’u vendosur dhe funksionuar brenda një godine përfaqësuese në të cilën ndodhet Ministria e Sistemit Politik dhe e Marrëdhënieve ndërmjet Bashkësive. 21 shkurti është caktuar nga UNESCO si Dita Ndërkombëtare e Gjuhës Amtare dhe kremtohet në të gjitha vendet e botës. Babai i linguistikës moderne, shkencëtari dhe gjuhëtari i famshëm amerikan Noam Çomski, ka thënë: “Gjuha nuk janë vetëm fjalët. Është kulturë, traditë, bashkim i shoqërisë, një histori e tërë që portretizon shoqërinë ashtu siç është. E gjithë kjo mishërohet nëpërmjet gjuhës.” Në këtë kontekst, Republika e Maqedonisë së Veriut në kuptimin e plotë të fjalës e pasqyron kuptimin e termit “diversitet”, sepse përfaqëson pasuri nga gjuhët, kulturat dhe fetë e ndryshme që ndërthuren brenda një zone gjeografike. Diversiteti gjuhësor, karakteri multikulturor dhe multikonfesional i shoqërisë sonë paraqet avantazh, e jo hendikep, dhe si specifika duhet të kultivohen dhe avancohen vazhdimisht në mënyrë që të sigurohet kohezioni shoqëror dhe bashkëjetesa midis komuniteteve. Nuk duhet që t’i nxisë idetë dhe ndarjet nacionaliste, por gjuha duhet të jetë faktor dhe mjet lidhës për veprimin ndëretnik. Respektimi dhe kujdesi për diversitetin gjuhësor duhet të jetë gjithmonë në fokus të politikave publike për të siguruar përfshirjen e të gjitha komuniteteve duke mbështetur trajtimin e barabartë të diversitetit gjuhësor, përkundër favorizimit të specifikave gjuhësore dhe kulturore vetëm të një etnie. E drejta për të përdorur gjuhën amtare paraqet të drejtën themelore për çdo individ, dhe zhvillimi i proceseve demokratike në një vend varet nga shkalla e realizimit të së drejtës së barazisë gjuhësore dhe respektimi i pluralitetit gjuhësor. Qëllimi i kësaj dite është të vlerësojmë gjuhën si një mjet të rëndësishëm për zhvillimin, sigurimin e diversitetit dhe dialogut ndërkulturor, si dhe forcimin e bashkëpunimit dhe arritjen e cilësisë në arsim për të gjithë, duke krijuar njëkohësisht shoqëri gjithëpërfshirëse. Gjuha shqipe është thesari ynë i përbashkët. Prandaj ta duam, ta mbrojmë dhe ta promovojmë atë së bashku brez pas brezi. Më lejoni, zonja dhe zotërinj, në fund të fjalimit tim, ta falënderoj edhe njëherë organizatorin për ftesën për pjesëmarrjen, si dhe për mundësinë për prononcimin tim në ngjarjen e sotme. [gallery bgs_gallery_type="slider" size="publisher-lg" ids="5357,5360,5363"]

Feb 22, 2021
news image
Drejtori i AZGJ-së, Ylber Sela vizitoi Inspektoratin Shtetëror të Mjedisit Jetësor

Drejtori i Agjencisë së Zbatimit të Gjuhës së RMV-së, Ylber Sela, sot e vizitoi Inspektoratin Shtetëror të Mjedisit Jetësor (ISHMJ) ku realizoi një takim me Ana Petrovskën, ushtruese detyre e drejtoreshës së këtij institucioni. Vizita ishte inicuar nga ana e drejtorit Y. Sela me qëllim të kuptimit të situatës lidhur me zbatimin e Ligjit të Përdorimit të Gjuhës në punën e Inspektoratit, si dhe krijimin e bashkëpunimit ndërmjet dy institucioneve për çështjet lidhur me përdorimin e gjuhëve zyrtare. Drejtoresha Petrovska theksoi se janë ndërmarrë hapa në drejtim të harmonizimit të punës së Inspektoratit me obligimet ligjore, por që ballafaqohen me mungesë të burimeve të kuadrit për përkthim të akteve zyrtare. Megjithatë premtoi se do të bëhen përpjekje për të tejkaluar këtë situatë. Që proceset e punës të mund të zhvillohen pa pengesa, drejtori Sela ofroi mbështetje të plotë në pjesën e ndihmës profesionale për përkthim dhe lekturim të akteve dhe dokumenteve zyrtare, si dhe i dorëzoi një pako botimesh të AZGJ-së. Në takim u konstatua nevoja për përshtatjen e akteve nënligjore që e përshkruajnë formën dhe përmbajtjen e akteve të inspektimit dhe që i përdor Inspektorati, me qëllim të ofrimit të versioneve gjuhësore të akteve në të dy gjuhët zyrtare. Në fund të takimit, të dy bashkëbiseduesit riafirmuan angazhimin e tyre për të vazhduar dialogun dhe bashkëpunimin ndërinstitucional. [gallery bgs_gallery_type="slider" bgs_gallery_image_size="full" size="publisher-lg" ids="5341"]

Feb 16, 2021
news image
U arrit bashkëpunim ndërinstitucional me Drejtorinë e Doganave

Drejtori i Agjencisë së Zbatimit të Gjuhës së RMV-së, Ylber Sela, e vizitoi Drejtorinë e Doganave të Republikës së Maqedonisë së Veriut, ku realizoi një takim pune me drejtorin, Goran Sugareski. Në takim u shqyrtua gjendja lidhur me zbatimin e detyrimeve të Ligjit të Përdorimit të Gjuhëve, në Drejtorinë e Doganave, duke përfshirë Drejtorinë Qendrore, doganat rajonale dhe filialet e doganave që funksionojnë në kuadër të tyre. Drejtori Sela, së bashku me përfaqësuesit e AZGJ-së, Jeton Sulejmani nga Sektori i Çështjeve të Përgjithshme dhe Juridike dhe i Menaxhimit të Burimeve Njerëzore dhe Llazo Matovski nga Sektori i Mbështetjes së Drejtorit, u informuan hollësisht nga Valentina Pivarova, ndihmësdrejtoreshë në Sektorin e Menaxhimit të Burimeve Njerëzore dhe Zoran Petkovski, ndihmësdrejtor në Sektorin e Punëve Administrative dhe Teknike, për aktivitetet e ndërmarra deri tani nga ana e Drejtorisë së Doganave lidhur me realizimin e detyrimeve që dalin nga zgjidhja ligjore për përdorimin e gjuhëve. Përkundër mosrealizimit në kohë të detyrimeve të caktuara, në takim u arrit bashkëpunim i përbashkët në nivel të grupeve të punës, me qëllim ndjekjen e gjendjes dhe harmonizimin me dispozitat ligjore. Në fund të takimit, drejtori Sela dorëzoi një pako botimesh të AZGj-së, ndërkaq u ofrua edhe ndihmë profesionale sa i takon përkthimit të formularëve, si dhe lekturimit të akteve zyrtare për nevojat e Drejtorisë së Doganave.

Feb 9, 2021
Informacion kontakti
  • St., "Philip the Second of Macedonia" no. 11,
    3rd floor Skopje, Republic of North Macedonia

  • Phone number
    02 312 1731
  • Email
    info@apj.gov.mk