Post image
Fjalë rasti e drejtorit të AZGJ-së, Ylber Sela në shënimin e 10 qershorit, Ditës së Lidhjes së Prizrenit

Jun 10, 2022

Të dashur miq!Sot, kur po e shënojmë Ditën e Lidhjes Shqiptare të Prizrenit, e cila u themelua më 1878, pra para 144 vjetësh, gjithsesi kemi një arsye të fuqishme për ta përkujtuar njërën nga motot kryesore të saj: “Pa gjuhë nuk ka komb”, moto kjo e cila edhe në këto rrethana na kthen tek esenca dhe semantika e saj. Nga ky këndvështrim ndoshta mund të duket pak romantike, por realisht kjo paraqet thelbin dhe vizionin kryesor të shqiptarëve në këtë periudhë të ndryshimeve historike.Pra, duhet ta përsërisim vazhdimisht se pa këtë gjuhë nuk ka asnjë perspektivë dhe as që mund ta paramendojmë ekzistencën tonë kombëtare. Siç e dimë, gjuha shqipe u kultivua nga rilindësit tanë dhe u ngrit në piedestalin më të lartë, prandaj këtë patjetër duhet ta bëjmë edhe sot pa asnjë ngurrim e pa asnjë dilemë.Duke qenë në krye të Agjencisë së Zbatimit të Gjuhës, mua më bie barra e përgjegjësisë që testamentin kombëtar të paraardhësve tanë për gjuhën shqipe ta bëj realitet edhe në këto hapësira ku jetojmë dhe veprojmë. Kjo nënkupton faktin se gjuhën shqipe duhet ta futim në përdorim zyrtar në institucionet shtetërore të Republikës së Maqedonisë së Veriut në përputhje me Ligjin e Përdorimit të Gjuhëve, së pari duke i ndihmuar institucionet që ta zbatojnë atë me përpikëri, por nga ana tjetër edhe duke zhvilluar aktivitete që kanë të bëjnë me ruajtjen, kultivimin, afirmimin dhe trajtimin ligjor të saj. Natyrisht, pjesëmarrja jonë e drejtpërdrejtë në këto aktivitete kulturore e shkencore, por edhe bashkëpunimi me institucionet e tjera anekënd hapësirës shqiptare dhe më gjerë, aq më tepër na bën krenarë që jemi kontribues të denjë për gjuhën shqipe.Me këtë rast, unë jam i prirur që në suaza të Lidhjes së Prizrenit ta shohim edhe veten tonë si një institucion që ka lindur si rezultat i vizionit të saj për gjuhën shqipe. Prandaj konsideroj se ne jemi trashëgimia dhe vazhdimësia historike dhe aktuale, jemi bartësit e frymës dhe të ideve të saj. Me anë të gjuhës shqipe ne do të vazhdojmë të ndihemi dhe ta quajmë veten shqiptarë deri në frymën e fundit. Në fakt, kjo është një arritje e madhe qytetëruese, kulturore dhe kombëtare për të cilën duhet të mburremi brez pas brezi. Dhe si e tillë kjo i bën krenarë shqiptarët, pa i dëmtuar të tjerët në asnjë mënyrë.Në fund, dëshiroj të theksoj se Agjencia e Zbatimit të Gjuhës e RMV-së do të mbetet besnike në këtë ecuri të pandalshme, gjithmonë duke menduar, folur e shkruar shqip. Ne çdo ditë japim mesazhin tonë: Jemi shqiptarë, prandaj duhet të flasim shqip kudo që të jemi, ndaj edhe në nivelet shtetërore. Në këtë mënyrë e përmbushim amanetin historik të Lidhjes së Prizrenit duke mbetur përjetësisht shqiptarë.Ju falemnderit![gallery size="publisher-lg" bgs_gallery_type="slider" bgs_gallery_image_size="full" ids="8748,8751,8754"]

Post image
Vizitë e suksesshme e drejtorit Sela në Grac të Austrisë

May 30, 2022

Më 25.5.2022, drejtori i Agjencisë së Zbatimit të Gjuhës së RMV-së kishte një vizitë pune në Grac të Austrisë. Takimi i parë i punës ishte me drejtuesit e Qendrës Europiane për Gjuhët Moderne,e cila është pjesë e Këshillit të Europës. Takimi i punës u zhvillua me drejtoreshën Sara Breslin, si dhe me udhëheqësin e administratës së kësaj qendre, Majkëll Armstrong. Drejtori Sela në hollësi e prezantoi historikun dhe veprimtarinë e Agjencisë, foli për mundësitë e bashkëpunimit, po ashtu theksoi nevojën për të mësuar nga përvojat e kësaj qendre dhe standardeve perëndimore. Drejtuesit e kësaj qendre të rëndësishme u shprehën të gatshëm të ofrojnë ndihmën e tyre dhe përvojën shumëvjeçare në fushën e shumëgjuhësisë. Gjatë takimit u fol edhe për modelet e suksesshme të shumëgjuhësisë në Europë, mundësitë e mbështetjes së përdorimit të dygjuhësisë dhe shumëgjuhësisë, mënyrat më efikase për vetëdijesimin qytetar, si dhe për përparësitë që ofron shumëgjuhësia në përgjithësi, cilësi këto që janë tepër të dobishme për veprimtarinë e Agjencisë në shërbim të zbatimit të Ligjit të Përdorimit të Gjuhëve. Poashtu u diskutuan edhe mundësitë e projekteve hulumtuese, si dhe të bashkëpunimit ndërinstitucional. Kjo qendër u shpreh e gatshme të mbështesë Agjencinë në misionin e saj, duke filluar me këshillimin, si dhe trajnimin e bashkëpunëtorëve të saj. Takimi i dytë i punës ishte me drejtoreshën e Qendrës për Gjuhë, Plurilingualizëm dhe Didaktikë në Universitetin e Gracit, Dr. Daniela Unger-Ullman. Drejtoresha e kësaj qendre bëri një prezantim të punës së vet tepër të suksesshme, përvojë nga e cila mund të mësojmë edhe ne. Me atë u bisedua poashtu për mundësitë e bashkëpunimit ndërinstitucional, sidomos në fushë të zhvillimit të politikave gjuhësore, dokumentimin е gjuhës, si dhe rritjes së standardit të mësimit dhe mësimdhënies së gjuhëve. Edhe drejtoresha Daniela Unger-Ullman u shpreh e gatshme ta kultivojë bashkëpunimin me Agjencinë e Zbatimit të Gjuhëve, si dhe ta vizitojë atë në një të ardhme të afërt. Shoqërues të drejtorit prof. dr. Ylber Sela në këtë udhëtim studimor ishin prof. dr. Izer Maksuti dhe Dardan Emini. Shkup, 27.5.2022  

Informacion kontakti
  • rr., “Filipi i Dytë i Maqedonisë” nr. 11, kati i 3-të
    Shkup, Republika e Maqedonisë së Veriut

  • Phone number
    02 312 1731
  • Email
    info@apj.gov.mk